මාලදිවයින් රජය විසින් ශ්‍රී ලාංකේය පුරවැසියන් සඳහා නව වීසා පහසුකමක් අනුමත කර තිබෙනවා. ජනාධිපති අනුර කුමාර දිසානායක මහතාගේ මාලදිවයින් සංචාරයට සමගාමීව ගන්නා ලද මෙම තීරණය අනුව, ශ්‍රී ලාංකේය සංචාරකයින්ට දින 90ක් වලංගු වන ‘on-arrival’ වීසා නොමිලේ ලබා ගත හැකියි. මෙම නව වීසා ප්‍රතිපාදනය ජූලි 29 වැනිදා සිට ක්‍රියාත්මක වනු ඇත.
වීසා ලබා ගැනීම සඳහා අයදුම්කරුවන් විසින් වලංගු විදේශ ගමන් බලපත්‍රයක් සහ මාලදිවයිනේ රැඳීමට ප්‍රමාණවත් මූල්‍ය සම්පත් ඇති බව ඔප්පු කළ යුතු බවයි මාලදිවයින් රජය පවසන්නේ.
මාලදිවයින් රජය පැහැදිලි කර ඇති පරිදි, මෙම පියවර ශ්‍රී ලංකාව සමඟ ඇති ද්විපාර්ශ්වික සබඳතා ශක්තිමත් කිරීමට සහ සංචාරක ක්ෂේත්‍රයේ සහයෝගීතාව වර්ධනය කිරීමට උපකාරී වනු ඇත. එසේම, මෙම තීරණය මගින් දෙරට අතර පවතින වීසා පහසුකම් සම්බන්ධ ගිවිසුම් කොන්දේසි සහ මාලදිවයිනේ ආගමන නීති රීතිවලට අනුකූලව අන්‍යෝන්‍ය සහයෝගීතාව ගොඩනඟා ගැනීම අරමුණු කර ගෙන තිබෙනවා.
මාලදිවයින් රජය අවධාරණය කරන පරිදි, මෙම පියවර ශ්‍රී ලංකාව සමඟ ඇති සමීප සබඳතාවයට අමතරව, ජනාධිපතිවරයාගේ සංචාරයේ ඇති වැදගත්කම පිළිබිඹු කරයි. මෙම නව වීසා පහසුකම ශ්‍රී ලාංකික සංචාරකයින්ට මාලදිවයිනට යාමට විශාල දිරිගැන්වීමක් වනු ඇතැයි අපේක්ෂා කෙරේ.
