මහනුවර, හන්තාන කන්ද තරණය කිරීමට ගිය සිසුන් පිරිසක් අතරින් 8 දෙනෙකු අතරමං වී සිටියදී, ආරක්ෂක අංශ විසින් අද (ජූනි 29) අලුයම් කාලයේදී ඔවුන්ව සාර්ථකව මුදාගෙන තිබෙනවා.

ඊයේ (ජූනි 28) හන්තාන කන්ද තරණය කළ මෙම සිසුන් පිරිස යළි කන්දෙන් බසින අවස්ථාවේදී හදිසියේ වර්ෂාව පතිත වී ඇත. එම අවස්ථාවේදී කණ්ඩායමේ සිටි සිසුන් 8 දෙනෙකුට මාර්ගය වැරදී කන්දේ අතරමං වී ඇති බවයි වාර්තා වන්නේ.

කණ්ඩායමේ සිටි අනෙකුත් සිසුන් විසින් අතරමං වූ සිසුන්ගේ මව්පියන්ට මේ පිළිබඳව දැනුම් දී ඇති අතර, පසුව එම මව්පියන් සිද්ධිය පිළිබඳව පාර්ලිමේන්තු මන්ත්‍රී ජගත් මනුවර්ණ මහතා දැනුවත් කර තිබෙනවා. මන්ත්‍රීවරයා වහාම ක්‍රියාත්මක වී අදාළ ආරක්ෂක අංශ දැනුවත් කිරීමට කටයුතු කර ඇත.

පසුව, තලාතුඔය පොලීසියේ නිලධාරීන් සහ හමුදා සාමාජිකයින් එක්ව ඊයේ (ජූනි 28) රාත්‍රියේම හන්තාන කන්දේ මෙහෙයුම් ආරම්භ කර තිබෙනවා. මෙම මෙහෙයුම්වල දී අද අලුයම 2:00ට පමණ මෙම සිසුන් පිරිස සිටින ස්ථානය සොයා ගැනීමට ආරක්ෂක අංශ සමත් වූ අතර, අලුයම 4:00ට පමණ ඔවුන්ව ආරක්ෂිතව කන්දෙන් පහළට රැගෙන ඒමට හැකි වී ඇත.

මුදාගත් සිසුන් 8 දෙනා පේරාදෙණිය රෝහල වෙත ඇතුළත් කිරීමට පසුව කටයුතු කර ඇත. මෙලෙස හන්තාන කන්දේ අතරමංව ඇත්තේ තලාතුඔය, රටේමුල්ලේ ප්‍රදේශයේ පදිංචි සිසුන් පිරිසක් බවයි වාර්තා වන්නේ.