අද (12) ලොව රටවල් කිහිපයක WhatsApp පරිශීලකයින් යෙදුම භාවිතා කරන අතරතුර බිඳවැටීමට ලක්ව ඇති බව විදෙස් මාධ්‍ය වාර්තා කරනවා.

එහිදී පරිශීලකයින් බොහෝ දෙනෙකුට තත්ව (Status) උඩුගත කිරීමට හෝ පණිවිඩ යැවීමට මෙන්ම, සමූහයන් තුළ පණිවිඩ හුවමාරු කරගැනීමට නොහැකි වූ බවට පැමිණිලි රැසක් ඉදිරිපත් කර තිබෙනවා.

මෙම ගැටළුව මුලින්ම අද පස්වරුවේ වාර්තා වූ අතර, රාත්‍රී 8 ට පමණ නැවත මතු වූ බව තත්‍ය කාලීන ඇනහිටීම් නිරීක්ෂණ වෙබ් අඩවියක් වන DownDetector පවසනවා.

DownDetector විසින් එකතු කරන ලද දත්තවලින් හෙළි වූයේ සවස් වන විට අවම වශයෙන් පැමිණිලි 597 ක් ලියාපදිංචි වී ඇති බවත්, 85% ක් පණිවිඩ යැවීමේ ගැටළු, 12% ක් සාමාන්‍ය යෙදුම් ක්‍රියාකාරකම් සහ 3% ක් පිවිසුම් ගැටළු සම්බන්ධ බවයි.