ජනප්‍රිය ශිෂ්‍යත්ව ගුරුවරියක් වන “ටීචර් අම්මා” නොහොත් හයේෂිකා ප්‍රනාන්දුගෙන් පහරදීමකට ලක් වූ තරුණයෙක් වෘෂණ කෝෂවලට හානි සිදුවීම හේතුවෙන් මීගමුව රෝහලේ ප්‍රතිකාර ලබනවා.
පහරදුන් ගුරුවරිය ප්‍රදේශයෙන් පලා ගොස් ඇති අතර, ඇයගේ සැමියා සහ කළමනාකරු මෙම සිද්ධිය සම්බන්ධයෙන් කටාන පොලිසිය විසින් අත්අඩංගුවට ගෙන තිබෙනවා.
අත්අඩංගුවට ගත් සැමියා සහ කළමනාකරු ඊයේ (09) මීගමුව අධිකරණයට ඉදිරිපත් කිරීමෙන් පසු ලබන 14 වනදා දක්වා රිමාන්ඩ් කර තිබෙනවා.
මේ වන විට සැඟව සිටින ‘ටීචර් අම්මා’ නමින් ප්‍රසිද්ධ ගුරුවරිය අත්අඩංගුවට ගෙන අධිකරණයට ඉදිරිපත් කරන ලෙස මහේස්ත්‍රාත්වරයා පොලිසියට නියෝග කර තිබෙනවා.
පහර කෑමට ලක් වූ 32 හැවිරිදි තරුණයා කටාන ප්‍රදේශයේ පදිංචිකරුවෙක් බව පොලිසිය පවසනවා. ඔහුගේ සහෝදරිය යැවූ වට්ස්ඇප් පණිවිඩයක් සම්බන්ධයෙන් ඇති වූ ආරවුලක් දුරදිග යාමෙන් මෙම පහරදීම සිදුවී ඇති බව පොලිස් විමර්ශනවලින් හෙළි වී තිබෙනවා.
පහර කෑමට ලක් වූ තරුණයා අදාළ ගුරුවරිය යටතේ සේවය කළ සේවකයෙක් බවයි වාර්තා වන්නේ.
