ලොව පුරා උෂ්ණත්වය ඉහළ නැංවීමට සහ දරුණු කාලගුණික විපර්යාස ඇති කිරීමට බලපාන ප්‍රධාන ස්වභාවික සංසිද්ධියක් වන “එල්-නිනෝ” (El Niño) තත්ත්වය මේ වන විට නිල වශයෙන් ආරම්භ වී ඇති බව විදෙස් මාධ්‍ය වාර්තා කරයි.

අමෙරිකා එක්සත් ජනපදයේ ජාතික සාගර හා වායුගෝලීය පරිපාලන ආයතනය (NOAA) නිවේදනය කර ඇත්තේ, මධ්‍යම සහ නැගෙනහිර සමකාසන්න පැසිෆික් සාගර කලාපයේ මුහුදු මතුපිට උෂ්ණත්වය සාමාන්‍ය අගයට වඩා සෙල්සියස් අංශක 0.5කින් ඉහළ ගොස් ඇති බවයි. එය එල්-නිනෝ තත්ත්වයක් ලෙස නිල වශයෙන් ප්‍රකාශ කිරීමට අවශ්‍ය සීමාව ඉක්මවා යාමකි. මෙවර එල්-නිනෝ තත්ත්වය ඉතා ප්‍රබල හෙවත් “දරුණු එල්-නිනෝ” තත්ත්වයක් දක්වා වර්ධනය විය හැකි අතර, එය ඉතිහාසයේ වාර්තා වූ ප්‍රබලතම සංසිද්ධීන් අතරට එක්විය හැකි බවට ද විද්‍යාඥයෝ අනාවැකි පළ කරති.

මිනිස් ක්‍රියාකාරකම් නිසා සිදුවන ගෝලීය උණුසුම් වීමට අමතරව මෙම තත්ත්වය ද එකතු වීම හේතුවෙන්, ඉදිරි වසරක කාලය (බොහෝ දුරට 2027 වසර) ලොව වාර්තාගත උණුසුම්ම වසර බවට පත්විය හැකි බව විශේෂඥයෝ පෙන්වා දෙති. මෙමඟින් ලොව පුරා කාලගුණික රටාවන්හි විශාල වෙනස්කම් සිදු වෙමින් නියඟ, අධික වර්ෂාපතනය, ගංවතුර, උෂ්ණත්ව තරංග (Heatwaves) සහ කෘෂිකාර්මික බෝග විනාශ වීම් වැනි අහිතකර තත්ත්වයන් උග්‍ර විය හැකිය.

සමකාසන්න පැසිෆික් කලාපයට ඉහළින් පවතින සුළං රටාවන්හි වෙනස්කම් ද මේ වන විට නිරීක්ෂණය වන අතර, සාගර උෂ්ණත්වය ඉහළ යාමට වායුගෝලය ද ප්‍රතිචාර දක්වන බව NOAA ආයතනය පවසයි. මේ හේතුවෙන් ඉදිරි මාස කිහිපය තුළ ලෝකයේ විවිධ ප්‍රදේශවල අයහපත් කාලගුණික සිදුවීම් බහුල විය හැකි බවට ජාත්‍යන්තර කාලගුණ විද්‍යා ආයතන සෙසු රටවලට අනතුරු අඟවා තිබේ.