යම් පුද්ගලයෙකුට දේපළ තිබීම දේශපාලනයට පිවිසීමට බාධාවක් නොවන බව කැබිනට් ප්රකාශක සහ අමාත්ය නලින්ද ජයතිස්ස මහතා අවධාරණය කරයි.
මාධ්යවේදියෙකු විසින් අසන ලද ප්රශ්නයකට පිළිතුරු දෙමින් අමාත්යවරයා පැවසුවේ, ගැටලුවක් පැන නගින්නේ උපයාගත් ආකාරය පැහැදිලි කළ නොහැකි දේපළ හෝ වත්කම් තිබීම සම්බන්ධයෙන් බවයි. තම පක්ෂය කිසිවිටෙකත් පුද්ගලයෙකුට දේපළ තිබීම සම්බන්ධයෙන් විරෝධය පළ නොකරන බවත්, ප්රශ්නය ඇත්තේ හෙළිදරව් කළ නොහැකි මූලාශ්රවලින් ධනය උපයා ගැනීම බවත් ඔහු සඳහන් කළා.
අමාත්යවරයා තවදුරටත් කියා සිටියේ, තම පක්ෂයේ මැති ඇමතිවරුන්ගේ දේපළ මේ වන විටත් ප්රසිද්ධ කර ඇති බවත්, එය රටට හොඳ ආදර්ශයක් බවත්ය. මෙම ප්රකාශය දූෂණ විරෝධී පාලනයක් සඳහා රජය දක්වන කැපවීම පෙන්නුම් කරන බව බොහෝ දෙනාගේ අදහසයි.
