විදුලිය ඇතුළු ඕනෑම භාණ්ඩයක පිරිවැයක් ඇති බවත්, එම පිරිවැය අනුව මිල වෙනස් වන බවත් අමාත්‍ය කේ.ඩී. ලාල්කාන්ත මහතා ප්‍රකාශ කරනවා.
මාධ්‍ය වෙත අදහස් දක්වමින් අමාත්‍යවරයා සඳහන් කළේ, වත්මන් ආණ්ඩුව බලයට පත්වූ පසු විදුලි බිල අඩු කළ බවත්, දැන් විදුලි ගාස්තු වැඩි කිරීමට සිදුව ඇති බවත්ය. ඔහු පෙන්වා දෙන්නේ, ජනතාව මිල අඩු වන විට එයට හුරු විය යුතු සේම, මිල වැඩි වන විටද එයට පුරුදු විය යුතු බවයි.
අමාත්‍ය ලාල්කාන්ත මෙරට දේශපාලන සංස්කෘතියේ පවතින ගැටලුවක්ද පෙන්වා දුන්නා. එනම්, විදුලි ගාස්තු අඩු කළ විට පෙනී සිටින දේශපාලඥයන්, ගාස්තු වැඩි කළ විට සැඟවීමට උත්සාහ කිරීමයි. මෙම ක්‍රියාවන් දෙකම අනුමත කළ නොහැකි බව ඔහු අවධාරණය කළා.
නැවතත් විදුලි ගාස්තු අඩුවන හෝ වැඩිවන අවස්ථාවක් පැමිණිය හැකි බවත්, එම තත්ත්වයන් දෙකම දරාගෙන ඉදිරියට යා යුතු බවත් අමාත්‍ය කේ.ඩී. ලාල්කාන්ත මහතා වැඩිදුරටත් ප්‍රකාශ කර සිටියේ. මෙම ප්‍රකාශයත් සමග විදුලි ගාස්තු සංශෝධනය පිළිබඳව මහජනතාව අතර විවිධ අදහස් හුවමාරු වෙමින් පවතිනවා.
