මුලතිව්, කල්ලප්පාඩු වෙරළ තීරයෙන් ධීවර කටයුතු සඳහා මුහුදු ගිය ධීවරයින් දෙදෙනෙකු අතුරුදන් වී ඇති බව වාර්තා වේ. පසුගිය 02 වනදා පෙරවරුවේ මුහුදු ගිය මොවුන් මේ වන තෙක් නැවත පැමිණ නොමැති බව ඥාතීන් පවසයි.

අතුරුදන් වූ ධීවරයින් සම්බන්ධයෙන් ඊයේ (03) දිනය වන තෙක් කිසිදු තොරතුරක් නොලැබීම හේතුවෙන් ඔවුන්ගේ පවුල්වල සාමාජිකයින් දැඩි කනස්සල්ලට පත්ව සිටී. මේ පිළිබඳව වහාම ක්‍රියාත්මක වූ ඥාතීන් ශ්‍රී ලංකා නාවික හමුදාව වෙත පැමිණිලි කර ඇති අතර, අතුරුදන්වූවන් සොයා සහය වන ලෙස ඉල්ලා තිබේ.

සිද්ධිය සැලවීමත් සමඟ ප්‍රදේශයේ ධීවරයින් එක්ව ඊයේ දිනයේදී අදාළ මුහුදු ප්‍රදේශය පරීක්ෂා කළ ද එය සාර්ථක වී නොමැත. කෙසේ වෙතත්, අද (04) උදෑසන සිට නාවික හමුදාවේ සහ ප්‍රදේශයේ ධීවර ප්‍රජාවගේ සහභාගීත්වයෙන් නැවතත් පුළුල් සෝදිසි මෙහෙයුමක් ආරම්භ කිරීමට නියමිතව ඇත.