හොරණ, මූණගම හන්දිය ප්රදේශයේදී සිදු වූ රිය අනතුරකින් පුද්ගලයෙකු ජීවිතක්ෂයට පත්ව තිබේ. හොරණ – වවුල්ගල මාර්ගයේ වවුලගල දෙසට ධාවනය වූ යතුරුපැදියක්, මාර්ගය හරහා ගමන් කරමින් සිටි 73 හැවිරිදි පදිකයෙකුගේ ගැටීමෙන් මෙම අනතුර සිදුව ඇති බව පොලිසිය පවසයි.
අනතුරින් බරපතළ තුවාල ලැබූ එම පුද්ගලයා හොරණ මූලික රෝහල වෙත ඇතුළත් කරන අවස්ථාව වන විටත් මියගොස් සිටි බව සඳහන් වේ. සිද්ධිය සම්බන්ධයෙන් යතුරුපැදිකරු අත්අඩංගුවට ගෙන ඇති අතර, හොරණ පොලිසිය වැඩිදුර විමර්ශන සිදුකරයි.
