මිහින්තලේ පොලිස් ස්ථානයේ සිරකුටියක රඳවා සිටි මහා පරිමාණ ‘අයිස්’ (Crystal Meth) මත්ද්රව්ය ජාවාරමකට සම්බන්ධ සැකකරුවන් දෙදෙනෙකු අද (04) අලුයම සිරකුටියේ අගුල කඩා දමා පොලිසියෙන් සූක්ෂ්ම ලෙස පළාගොස් තිබේ.
පොලිස් ආරක්ෂාව මධ්යයේ සිදුවූ මෙම අත්භූත පළායාම හේතුවෙන් මිහින්තලේ පොලිස් ස්ථානයේ ආරක්ෂාව පිළිබඳව දැඩි ගැටලුකාරී තත්ත්වයක් මතුව ඇත.
මිහින්තලේ පොලිස් ස්ථානයේ නිලධාරීන්ට ලද රහසිගත තොරතුරකට අනුව ඊයේ (03) පස්වරුවේ සිදුකළ විශේෂ වැටලීමකදී මෙම සැකකරුවන් දෙදෙනා අයිස් මත්ද්රව්ය ද සමඟින් අත්අඩංගුවට ගෙන තිබුණි. මෙලෙස අත්අඩංගුවට පත්ව සිටියේ මිහින්තලේ, අඹතලාගම ප්රදේශයේ පදිංචි වයස අවුරුදු 29 සහ 30 යන වයස් කාණ්ඩවල පසුවන තරුණයන් දෙදෙනෙකි.
අත්අඩංගුවට ගත් සැකකරුවන් අද (04) දින අනුරාධපුර මහේස්ත්රාත් අධිකරණය වෙත ඉදිරිපත් කිරීමට නියමිතව තිබූ අතර, ඒ සඳහා සිරකුටිය තුළ රඳවා සිටියදී අද අලුයම කාලයේදී ඔවුන් මෙලෙස පොලිස් නිලධාරීන්ගේ ඇස් වසා පළාගොස් තිබේ.
සැකකරුවන් සිරකුටියේ අගුල ගලවා පළාගොස් ඇති බව දැනගත් වහාම ක්රියාත්මක වූ උතුරු මැද පළාත් භාර ඉහළ පොලිස් බලධාරීන්, ඔවුන් යළි අත්අඩංගුවට ගැනීම සඳහා විශේෂ පොලිස් කණ්ඩායම් කිහිපයක් වහාම පත් කර තිබේ.
මිහින්තලේ සහ අනුරාධපුර අවට ප්රදේශවල මෙන්ම සැකකරුවන්ගේ පදිංචි ස්ථාන ආශ්රිතව ද මේ වන විට විශේෂ සෝදිසි මෙහෙයුම් (Manhunt) අරඹා ඇති අතර, පොලිස් ස්ථානය තුළ සිදුවූ මෙම බරපතල ආරක්ෂක වැරැද්ද සම්බන්ධයෙන් සහ රාජකාරිය පැහැර හැර ඇති නිලධාරීන් පිළිබඳව සෙවීමට ද අභ්යන්තර විමර්ශනයක් ආරම්භ කර ඇත.
